Исана лъабабилеб нухалда тIобитIулеб бугеб гьеб чемпионаталда гIахьаллъизе руго дунялалъул щуго континенталъул 41 улкаялдаса 165 спортсмен. Гьезда гъорлъ руго Россия, Чехия, Молдавия, Сербия, Венгрия, Румыния, Италия, Испания, Украина, Белоруссия, Франция, Германия, Турция, Гуржия, Латвии, Казахстан, Азербайджан, Куба, Индия, Китай, Колумбия, Иран гIадинал ва жеги гIемерал улкаби. Гьедин бицана Чехиялъул гугаригун рагъ жубазабураб спорталъул тайпаялъул Цолъиялъул нухмалъулев Перт Карешица. Гьесулго рагIабазда рекъон, чемпионаталъухъ балагьизе вачIине вуго 1000ялдаса цIикIкIун чи.
Хас гьабун Прагаялда щайин гьеб чемпионат тIобитIулеб, Чехиялъул гьелда гIахьаллъизе гIураб даражаялъул спортсменал ругищан гьикъана нижеца Перт Карешида.
Перт Кареш: «Щайгурелъул Чехиялда букIун Европаялдаго гьел къецал гьаризе тIаде босараб гуцIи- гугаригун рагъ жубазабураб спорталъул тайпаялъул Цолъи. Чехиялда гьеб спорт хехго цебе тIолеб буго, гьеб машгъуллъаразул ва гьелъухъ балагьизе бокьулезул къадарги цIикIкIунеб буго. Дида ккола гьел къецал тIоритIизе ругеб аренаялда азаргоялдаса цIикIкIун чи гьунин. Гьел къецазул финал тIобитIулеб сордоялъ гьеб бихьизабизе буго дунялалъул 15 улкаялда. Дида ккола гIемерал улкабазул гьелдехун кIвар букIине бугин».
Карешица бицухъе, Чехиялда руго бицен гьабулеб чемпионаталда гIахьаллъизе гIураб даражаялъул спортсменал.
Перт Кареш: «Къецал рукIине руго анкьго батIияб цIайиялда. Щибаб цIайиялда вукIуна цо-цо улкаялдаса цо-цо чи. Чехиялдасаги гьенив гIахьаллъизе вуго анкьго спортсмен».
Исана лъилха ругел гьенир бергьине цIиккун ресал?
Перт Кареш: «ММА-ялда бищунго лъикIал руго Россиялъул командаялдаса спортсменал. Казахстаналъулги буго гьениб бергьине лъикIаб рес. Дида ккола Чехиялдаса цо яги кIиго спортсменасулги ругин гьениб лъикIал хIасил бихьизабизе ресин. Балагьилаха щиб кколебали».
ММА-ялъул рахъалъ Россиялъул тIасабищараб командаялда руго:
БахачгIалиев БахачгIали (61,2 кг-МахIачхъала),
Юнусилав МухIамад (65,8 кг-Москва),
Рабаданов ХIажи (70,3 кг –Челябинск),
ХирамухIамадов ХIажимурад (77,1 кг -Москва),
ХирамухIамадов ХIамзат (84 кг -Москва),
Анкалаев МухIамад (93 кг-МахIачхъала),
93 кг тIаде Куниев Ризван (МахIачхъала).
Гьел баянал кьолел руго ММА-ялъул Россиялъул Цолъиялъул вице-президент Борис Бурзиевас.
13 ноябралъул сардилъ Парижалда гьарурал тIадекIанцIияздаса хадуб цо-цо улкабазда нахъе рахъана батIи-батIиял спорталъул кIудия-кIудиял къецал, миллиял командабазул футболалъул къецазде щун. ХIинкъигьечIолъи цIуниялъул рахъалъ кинал тадбирал нужеца тIоритIулел ругелин гьикъана нижеца ММА-ялъул Чехиялъул Цолъиялъул нухмалъулев Петр Карешида?
Перт Кареш: «Нижецаги гьеб киналъего кIвар кьезе ккола ва ахирисеб заманаялъул тIалабазда рекъезабизе ккола цIуна-къаялъул иш. Ниж улкаялъул полициягун ва низам цIунулелгун рекъонхIалтIулел руго. Гьаб чемпионаталда хIинкъигьечIолъи чIезабиялъул суал гьоркьоб лъезе буго низам цIунулезул итни коялда букIине бугеб хасаб данделъиялдаги. Гьеб чемпионаталда хIинкъигьечIолъи чIезаби букIине буго нижер тIоцересел масъалабазул цояблъун».
