Араб соналъул декабралъул ахиралда рикъун рукIарал Дербенталдаса Гамлет Кельбисов ва Рустам ХIабибов гьанже ратун руго Владикавказалда бугеб заманалъулаб туснахъалда ай ИВСалда. Гьезда гIайиб гIунтIизабулеб буго тамихIалъул кодексалъул кIиго бутIаялдалъун: чи чIвай ва къануналда рекъечIого ярагъ тIибитIизаби. Кельбисовасул ва ХIабибовасул гIагарлъиялъни абулеб буго, гьабичIеб такъсиралъе мукIурлъизе тIамулел ругин гьел. Гьединго, гIагарлъиялдаса чагIаз абухъе, Дагъистаналъул нухмалъулесул цIар хъублъизабиялъе гIоло гIакъубаби кьолел руго Кельбисовасе ва ХIабибовасе.
Кельбисовасул вац Робертица бицаралда рекъон, 26-леб декабралда гьесухъе телефоналдасан кIалъана «Рандеву» кафеялъул хважаин. Гьес бицана кафеялда рукIарал Гамлетги гьесул гьудул Кадимбекги ккун анин маскаби ххурал чагIазилан. Кельбисов вортун вуго вац валагьизе, амма шагьаралда бугеб полициялъул бутIаялда гьесда абун буго вац жидехъ гьечIилан ва гьесул хIакъалъулъ информацияги гьечIин жидехъилан.
Кельбисовас ахIун буго ХIабибовасухъе, амма гьесул телефон свинабун батиндал, ахIун буго гьесул гIагарлъиялдаса чагIазухъе. Гамлетил хIакъалъулъ гьезда щибго лъалеб букIун гьечIо, гьединго гьезда Рустам вугеб бакIги лъалеб букIун гьечIо. Гьанибго тIаде жубала, Гамлет ва Рустам гьудулзабилъун ккола. Рустамил гIагарлъиялдаса чагIиги рортун руго гьев валагьизе, амма гьесулги лъалкI батун гьечIо. Кин гьев виларавали гьезда лъалеб гьечIо.
27 декабралда ХIабибовасул ва Кельбисовасул гIагарлъиялдаса чагIи гьел рилун ругин гIарзагун ун руго полициялъул бутIаялде ай Дербент шагьаралъул ОВДялде. ГIарзаби къабул гьаруна полициялъ ва гIагарлъиялдаса чагIазухъе хасал талонал кьуна.
Гьебго къоялда ХIабибовасул вац ХIабибихъе лъалареб номералдаса цо чияс ахIун буго ва абун буго Рустамида ва Гамлетида хурхун такъсир гьабиялъул иш рагьун бугин ва 28-леб декабралда Ессентуки шагьаралда диванханаялда гьезие низам тIаса бищизе бугин. Телефоналдаса кIалъарас абун буго Гамлет ва Рустам Ессентуки шагьаралда бугеб цIех-рехалъулаб туснахъалда ай СИЗОялда ругин. Гьединго гьев чияс абун буго гьел кIияздаго гIунтIизабулеб гIайиблъун кколин чи чIвай ва цIех-рехчагIаз рикIкIунеб бугин 2010-леб соналда гьез Москваялда Дагъистаналдаса бизнесмен чIванилан.
ХIабибовасул вац гьеб информациягун ун вуго Кельбисовасул гIагарлъиялъухъе. Гьесда гьез бицун буго, 2010-леб соналда Гамлетихъе рачIун рукIанин цебе рехсараб такъсир сабаблъунилан. Гьезул рагIабазда рекъон, гьикъа-бакъиги гьабун, ДНК-ялъул анализги босун цIех-рех чагIаз Гамлет нахъе вичана ва тIокIал гьесухъе щалниги рачIун рукIинчIо.
28-леб декабралда Роберт Кельбисов ва ХIабиб ХIабибов Ессентуки шагьаралде рачIана, амма диваналде гьел риччачIо. Диванханаялда аскIоб гьезда бихьана Дагъистаналъул номерал ругел автомобиль. Гьенир жанир щал ругелян балагьизе ана гьел ва салоналда ратана цIех-рех чагIаз Гамлетие ва Рустамие рихьизарурал адвокатал. Гьелги диваналде ричан гьечIо. Кельбисовасда ва ХIабибовасда вацал гьел къоязда рихьун гьечIо. Ессентуки шагьаралда бугеб СИЗОялдаса гьел нахъе рачанин бицун буго дежурнияс, амма мухIкан гьабун гьечIо кире гьел рачаралян.
Ахир-къад, гьал къоязда Кельбисовасул ва ХIабибовасул гIагарлъиялъухъе щвана информация гьел Владикавказалда ИВСалда ругилан. Шималияб Осетиялъул адвокатазул палатаялдаса Юрий Демченкогун ва Юрий Матачевгун къотIи-къай гьабуна такъсир гьабиялъулъ щаклъи бугезул гIагарлъиялъ. Амма гьел адвокатазе кIун гьечIо ИВСалде ине ва жидеца ихтиярал цIунулелгун дандчIвазе. ИВСалда гьезда абун буго цIех-рех бачунеб бугин Шималияб Кавказалъул федералияб икълималъул цIех-рехалъул идараялъул хасаб бутIаялъилан ва гьениса тIадкъай бачIанин ккуразухъе щалниги ричагеян.
Кельбесовасул ва ХIабибовасул ихтиярал гьанже цIунулел руго Дагъистаналдаса адвокат Сапият МухIамадовалъ. Гьелъ гIарзаби ритIана батIи-батIиял идарабазде.
Роберт Кельбисовас «Эркенлъиялъе» бицухъе, гьесухъ бугеб информациялда рекъон, гьесул вацасе ва ХIабибовасе гIакъубаби кьолел руго, гьездаса тIалаб гьабулеб буго Дербенталдаса бизнесмен Рафик Идрисовасда тIаса баянал кьей. Дагъистаналдаса цо-цо сайтазда цодагьалъ цебе лъураб информациялда рекъон, гьев чияс Азербайджаналдаса Дагъистаналде бачIунеб спирталъул канал ккун букIун буго ва гьеб бизнесалъе кумек гьабулеб букIун рагIула миграциялъулаб хъулухъалъул нухмалъулев Ражаб ГIабдулатIиповас.
Роберт Кельбисовас «Эркенлъиялъе» бицухъе, гьесухъ бугеб информациялда рекъон, гьесул вацасе ва ХIабибовасе гIакъубаби кьолел руго, гьездаса тIалаб гьабулеб буго Дербенталдаса бизнесмен Рафик Идрисовасда тIаса баянал кьей. Дагъистаналдаса цо-цо сайтазда цодагьалъ цебе лъураб информациялда рекъон, гьев чияс Азербайджаналдаса Дагъистаналде бачIунеб спирталъул канал ккун букIун буго ва гьеб бизнесалъе кумек гьабулеб букIун рагIула миграциялъулаб хъулухъалъул нухмалъулев Ражаб ГIабдулатIиповас.
Гьанибго ракIалде щвезабила, Миграциялъулаб хъулухъалъул Дагъистаналда бугеб идараялъул нухмалъулев ГIабдулатIипов низам цIунулез ккун вугин информация I3 январалда баккана социалиял сайтазда. Ришватчилъиялъул такъсирал сабаблъун ккун вугин, хъвалеб букIана цоял блоггераз. ТIаса ккун хIалтIи бачунеб батанин, хъвалеб букIана цогидаз. Лъабабилезни рикIкIунеб букIана республикаялъул нухмалъулесда данде гьабулеб провокация бугин гьебин. Хадуб Ражаб ГIабдулатIиповас баян кьуна низам цIунулел идарабазул рахъалдасан жиндехун суалал гьечIин. Щай гьел рачIун рукIаралали, гьес мухIкан гьабичIо.
2010-леб соналда Москваялда чIварав бизнесмен ГIабдулмажид ХIасанов хIалтIулев вукIана алкоголалъул нигIматал риччалел фирмаялда. Гьев чIвай цIех-рех чагIаз хурхинабулеб буго Идрисовасул цIаралда. Идрисовасул хIакъалъулъни цо-цо сайтазда хъван букIана гьев Россиялдаса тIурун вугин.
Кельбисовас абуна «Эркенлъиялъе» Гамлетгун цадахъ викъун вукIарав гьудул Кадимбек полициялъ нахъе виччан ватанин ва гьев квешго вухун вугин Дербент шагьаралъул ОВДеялда.
Роберт Кельбисов: «Вухун вуго гьев, электрошокералъ гIакъубаби кьун руго. Абулеб букIун буго жидее информация кьеилан Гамлет Кельбисовасда тIасаилан. Гьединго гьесда абулеб букIун буго гIунтIизарулел гIаийбазе мукIурлъеян. Амма ахир-къад гьесда тIад рехизе щибго жо батичIеб мехалда гьев нахъе вичана. Нижехъ бугеб информациялда рекъон, Гамлет ва Рустам рухулел руго ИВСалда, гьезие гIакъубаби кьолел руго. Рафик Идрисовасда ва Ражаб ГIабдулатIиповасда тIаса баянал кьезе тIамулел руго гьел. Сундулъниги гьезул гIайиб батани, къануназда рекъон щай цIех-рех гьабулареб? Рикъун, рухун, гIакъубаби кьун бачунеб буго гьеб цIех-рех. Дагъистаналъул нухмалъулесул цIар хъублъизабиялъул кампаниялъул къурбаналлъун ккана Гамлет ва Рустам. Дида гьедин кколеб буго. Гьеб Дагъистаналъул нухмалъулесда данде багъарараб кампания буго».
ЦIех-рех чагIазухъа баянал «Эркенлъиялъе» щвечIо. ЦIех-рех чагIазул къукъаялъе нухмалъи гьабулев Евгений Менджиевас абуна, киналгIаги баянал кьеларин ва гьезул хIалтIуе къимат кьезе бугин прокуратураялъ ва диваналъ. Дербент шагьаралъул ОВДялдаги баянал кьечIо «Эркенлъиялъе». Дежурнияс абуна, нухмалъулев хIалтIуда гьечIин ва баянал гьес гурони кьоларин
