Амма божизе бегьулел бакIалъа ЭР-ялъухъе щварал баяназда рекъон, МухIамад ГIисаевги нахъе вахъун, гьесул бакIалде тIамулев вуго Шамил ГIисаев. Гьес гьенир тIуразаризе рагIула инвестициязулгун транспорталъул ва промышленносталъул суалал. МухIамад ГIисаевин абуни тIадвуссунев вуго жиндирго букIараб хъулухъалде – туризмалъул комитеталде нухмалъулевлъун.
МухIамад ГIисаевги нахъе вахъун Шамил ГIисаев гьеб хъулухъалда теялъулъ магIна бихьулеб гьечIин жидедаян абуна ЭР-гун букIараб гара-чIвариялда цо-цо экономистаз.
Амма гьеб магIна жинда бихьулеб бугин бицана ЭР-ялъе журналист ва жамгIияв хIаракатчи Маркъо ШагIбановас.
Маркъо ШагIбанов: «Дида гьениб щибгIаги гIилла бихьулеб гьечIо гьеб хIукму бичIчIунгутIиялъе. Щай гьев вице-премьерлъун тезе бегьуларев, щиб гIунгутIи гьесул бугеб? Дида дагьа-макъав лъала Шамил ГIисаев. ГIезегIан хIалбихьиги бугев, хIалтIиги лъалев чи вуго гьев. Гьесухъа бажарилин ккола дида гьеб иш».
Дагъистаналда вацал ГIисаевазул бизнес буго цIатариялда хурхараб, гьединго Шамил ГIисаев ккола «Агромир» абураб компаниялъул нухмалъулевги. Гьединлъидал вацал ГIисаевазул хIалбихьиялде мугъчIвайги гьабун республикаялда транспорталъулъ, экономикаялъулъ цебетIей лъугьинабизе къваригIун батилин Рамазан ГIабдулатIиповасеян абуна ЭР-ялъе цо-цо экономистаз.
Масала, экономист Халил Халиловасул рагIабазда рекъон, улкаялъул нухмалъулесего гIадин, регионалъул бетIерасеги кIудияб кIвар буго къватIисан инвестициял рачIинариялъул. ХIажат буго инвестициял рачIунеб куцалда республикаялда гъоркьбакI рекъезабизе.
Халил Халилов: «Гьеб рахъалъ, ай промышленносталъулги, инвестициял рачIинариялъул рахъалъги иш беццилеб хIалалда гьечIо гьабсагIаталда. Ахираб заманалда гьединаб цебе туркIи гьечIо. Гьединлъидал Шамил ГIисаевас нухмалъи гьабулеб «Агромир» компаниялъ бихьизабулеб буго гьеб хIалтIи кинан гьабизе бегьулебали. ТIадежоялъе республика тун къватIирехун лъикIал бухьеналги руго гьесул.
Гьединлъидал кIудияб хьул буго инвестициял рачIинариялдаги промышленность цебетIезабиялдаги рухI речIчIизабилин гьесилан. Жакъа къоялда нилъее церетIезе къваригIун батани, нилъеца чара гьечIого кIвар кьезе ккарал рахъал руго гьел – инвестициялги, промышленностьги».
Республикаялда Шамил ГIисаев лъала бизнесмен, Халкъияб Мажлисалъул депутат ва Краснодар мухъалда чIарав бизнесмен Ризван ГIисаевасул вац хIисабалда. Краснодар мухъалда Ризван ГIисаевас рарал тIубарал шагьарал руго гьанже заманалъул тIалабазда данде кколедухъ.
Гьединабго шагьар «Немцазул росу» абун Дагъистаналдаги базе бокьун букIана бизнесменасе МухIу ГIалиев республикаялъул президентлъун вугеб заманалда, амма гьелъул хIасил ккечIо.
Цо-цо баяназда рекъон, президентги бизнесменги махсароде ккун руго Дагъистаналъул хIакимзабаз гьеб шагьар базе эркенал ракьал ругин МахIачхъалаялда аскIорилан. Гъаякент мухъалъул гIадамазда дандги бачIого гьабулеб букIараб гьеб хIалтIи, гьез ракьазда дагIбаги бан, гьоркьоб къотIана.
