АрбагI къоялъ МахIачхъалаялда Дагъистаналъул тIадегIанаб диванханаялда аскIов щалали лъаларел чагIаз вухарав, инсанасул ихтиярал цIунулеб "Меморил" идараялъул адвокат МухIамадов Мурад реанимациялдаса нахъе вачун вуго. Гьаб сагIат гьесие букIине кколеб медицинаялъул кумек гьабулеб бугин лъазабулеб буго МахIачхъалаялъул аслияб азарханаялъул тохтурзабаз.
Мурад сах гьавулев вугев нейрохирург, аслияб язарханаялъул нейрохирургиялъул бутIаялъул нухмалъулев Рабаданов Рабаданица «Эркенлъи» радиоялъе бицана адвокат гIезегIан лъикI вухун вугин, гьесул чорхоеги гIураб зарал ккун бугилан.
Рабаданов Рабадан: «Гьесул бетIер квешго бухун буго, гьелъул хIасилалда гIадалнахалъе жагъаллъи ккун буго. Гвангвараялъул ракьаги бекун буго Мурадил, кIиго бакIалдасан чанагъги гъурун буго. Цереса цабиги рортун руго, чанагъ бекун хадуб чанго гIусалъеги зарал ккун буго. КIветIги бихъизабун буго гьесул.
Гьеб гурониги къаркъалаялда киса-кирего гIадин руго хъахIиллъаби, биречарал бакIал. Гьедин букIаниги гьаб сагIат Мурад дагьаб мадаралда вугин абизе бегьула, тIокIав лъавудасаги инчIо гьев, рекIедаги вуго. Гьесие букIине кколебщинаб медицинаялъулаб кумек гьабулеб буго. Жакъаги цIидасан компьютералъул томографияги гьабуна, метерги цойги нухалъ рентгенги гьабизе буго».
Гьединго Рабадановас абуна вухун хадуб Мурадида цо-цо жо кIочон тун бугила, гьеб тIадекIанцIи гьабилалда цебе букIараб жо кинабго ракIалда бугила гьесда, амма хадуб ккараб щибго ракIалда гьечIилан. Тохтурасул рагIабазда рекъон гьеб хIинкъизе ккараб жо гьечIо, ботIер киб бугониги тункун, яги гьелда кьабун хадуб заманалъ жо-жо кIочон тезе бегьулеб буго гIадамазда, амма къокъаб заманалда кIочарабщинаб ракIалдеги бачIунеб буго гьезда.
Халкъаздагьоркьосеб инсанасул ихтиярал цIунулеб «Мемориал» идараялъул МахIачхъалаялда бугеб бутIаялъул адвокатлъун хIалтIулев вукIун вуго Мурад ахирисеб бащадаб соналъ. Гьединго адвокатазул «Кавказ» абураб коллегиялде гьоркьовеги уна гьев.
Мурадил лъалел –хъвалез ва цадахъ хIалтIулез «Эркенлъи» радиоялъе бицана гьес чанги изну гьечIого яргъидгIуцIаразул кьералъ рукIиналъул, ва терроризмалъулъ гIахьаллъи гьабиялъул гIайиб гIунтIизабурал гIадамал цIунулаанилан. Гьес цойгидал адвокатаз гIадин ишал тIаса рищулароанила, бокьарав чиясе кумек гьабулаанилан.
Гьеб тIадекIанцIи гьабураб къоялъги СагIид-апанди чIваялъул гIайиб гIунтIизабулел ругезда тIад гьабулеб диваналъул данделъиялдаса вачIине вукIун вуго мурад. Гьеб такъсир гьабиялъул гIайиб гIунтIизабулезул цояв ГIамирханов МухIамадил адвокат кколев вуго Мурад. Гьебго такъсир гьабиялъул гIайиб гIунтIизабулев вугев Лабазанов Шихмирзал адвокат ХIамидов Ринатица бицана гьеб иш гIезегIан гIодой биччан унеб букIанилан, амма гьеб Мурад вухараб къоялъ гьенире диваналде цо батIи-батIиял жеги киданиги гьенир рихьичIел гIадал гIолохъаби спортсменал рачIун рукIанилан.
Мурад вухиялъул нугIзаллъун рукIараз абулеб бугила цо тIаде балагьун спортсменал гIадал гIолохъабаз вуханин гьевилан. Ринатицаги, вухарав МухIамадовасги гьеб тIадекIанцIи бухьинабулеб буго СагIид-афанди чIваялъул щаклъи бугезул ишалда.
ХIамидов Ринат: «СагIид-апанди чIваялда щаклъи бугезда тIад диван гьабулеб букIана, данделъи букIунеб хIалалъ унеб букIана, гIадатияб диван букIанин абизе бегьула. Щивниги лъидениги я ахIделев вукIинчIо, рагъилел рукIинчIо кIиябго рахъалъул гIадам гIодореги риччан рукIана диваналъул данделъиялда. Амма гьаниб абизе ккола цере рукIарал гьел данделъабазде дандеккун гьаб нухалда гIемерав чи вачIун вукIанин гьенивейилан.
ГIемерисел гьел чIварав СагIид-апандил мюртидзаби рукIин рихьулел рукIанал. Цере-цере диваналде гьелали кир гурин, чIварасул рахъалъ бищун цересел чагIигицин рукIинчIо. Дун цойгидаб диваналъул хIукму лъазегIан лъалхъана гьенив, Мурад цеве ана къватIиве. Цо дагьаб заманалдаса диде кIалъан вачIана гьеб ишалъул цойги кIиго гIахьалчи цIунулев вугев адвокат МухIамадов НурмухIамад.
Гьес абуна Мурадиде тIадекIанцIи гьабун бугин, жиндиеги хIинкъалаби кьолел рукIанин, гьеб ишалдаса инкар гьабейин абунила гьез жиндида. Дуда хадурги рачIине бегьулила гьел, цIодорлъи гьабун вукIайин абуна гьес. Дир талихI ккана дун Мурадида цадахъ къватIиве вахъинчIолъи. Рагьун хIинкъалаби кьечIониги цебе-цебе чанцIулго дидаги бичIчIизабун букIана гьеб ишалда гьоркьоса мун нахъе вилълъани лъикI букIине бугилан».
Дагъистаналъул жанисел ишазул министрелъиялъул пресс-хъулухъалъул баяназда рекъон Мурад МухIамадовасде тIадекIанцIи гьабиялда хурхун цIех-рех байбихьулеб буго, такъсиргьабиялъул иш рагьизе хIадурлъи гьабулеб буго. Гьеб гурони жанисел ишазул идараялъ тIокIал киналгIаги баяналги кьечIо. МухIамадов Мурадил гIагарлъиялъ «Эркенлъи» радиоялъе кьурал баяназда рекъон жанисел ишазул идараялде гIарза хъвачIониги, гьеб лъугьа-бахъиналъул цIех-рех гьабизе хамиз къоялъ Мурадихъе азарханаялде вачIун вукIун вуго полициялъул хIалтIухъанги.
